กีฬาโบก-นิทานก้อม

คนเฮานี่ ก็มักกันไปคนละอย่างสองอย่างเน๊าะ ลางคนกะมักตีไก่ ลางคนกะมักกินเหล่า เจ้าซู่ มักเล่นม่า การพะนัน บาดนี่หมอนี่แปลกเด้อ มักกีฬาโบก

ฮ่วย โบกมันกะคือการพะนันชนิดหนึ่งนั่นหละคือกับไฮโล เครื่องมือก็ใช้บั้งไม้ไผ่เฮ็ดเป็นถ้วยงูมนัยหมากขามผ่าซีก 4 อัน ยามเพิ่นเล่นเจ้ามือเขย่า ๆ ๆ งูมปั๊บ ลูกขากะแทงตี๊ล่ะ คูก คีก ขาวล้วน ดำล้วน กะว่ากันไป โฮ ได้เสียหลายเด๊ หั่นเล่นติดลม คือกับอึ่งตกมวกแล่ว เบิดนาเบิดไฮกะแล่วกันน่ะ

ทิดเสือเพิ่นนี่ละมักกีฬาโบกขนาด มีอยู่เทือหนึ่งมีศพคนตายเพิ่นกะมีงันเฮียนดี อยู่เป็นหมู่เจ้าเฮียน กะมีการเล่นการพะนันโบกนำเด้ ..วาย..ทิดเสือคนมักโบกบ่พลาดกะแล้วกัน เล่นอยู่นั่นละ เบิดมื่อเบิดคืน ได้เงินเมียติดถุงไปพันหนึ่ง เบิดออดหลอด เงินเบิดกะต้องกลับบ้านฮะแหล่ว พอฮอดเฮียน เมียเพิ่นเห็นหน้าก็ฮู้แล้วว่า เล่นเสียมาแล้ว กะเลยหาข้าวปลาอาหารมาให้กินแบบคนเคียดหลาย บ่เต็มใจเอาซะเลย บาดนี่ทิดเสือเพิ่นหัวกะเซาโบกมาใหม่ ๆ น๊อกะสิคือคนเมาเหล้าตี๊ มัวเมาหลาย

เมีย (เอาติ๊บข้าวมาวาง)………..
ทิดเสือ.(ฮ้องแทงโบก)…………คูก (ภาษาไทยว่า “คู่”)

เมีย (เอาพาข้าวมาวาง)…………
ทิดเสือ (ฮ้องแทงโบก)…………คีก (ภาษาไทยว่า “คี่”)

เมียทิดเสือเพิ่นกะใจฮ่ายหลายเนาะ เพิ่นกะเลยกองก้นเปิดสิ่น แถมบ่มีซ่งซั่นในซ่ำเด๊ ใส่หน้าผัวเจ้าของ ฮ้องว่า
“เอา..นี่แม่นหยัง…บักฮา”

ทิดเสือ (มีความฮู้สึกแบบเปิดถ้วยแทง รับรองบ่มีพลาดแล้วเทือนี้.. เพิ่นฮ้องแทงสุดเสียง)

“ดำล้วนนนนนนน”